كلامى باين م العنوان....كلام مش طالع م اللسان...ده طالع م القلب و الوجدان
كلام له معنى, المعنى اللى يجمعنا وبه نحقق احلامنا...معنى تكبر به امانينا و تحلو به ايامنا
سمعت كلمة ف وسط الكلام
رنت ف عقلى و جابت وراها كلام
الكلمة دى كانت الف لأ
و هل ليها مغذى ولا لأ؟
الف لأ للخيانة...الف لأ للغدر
الف لأ للأ نانية...الف لأ للهجر
لأ للكراهية و لأ للعنصرية
لأ للسلبية و اليأس و الروح الانهزامية
لأ للماديات اللى خنقت الشباب
و مطيرة نومهم ورا كل باب
لأ للضغوط اللى كاتمة ع القلوب
لأ ع البيوت اللى ف ثانية بتبقى طوب
لأ ياللى حلمت مرة وفشلت
حاول ميت مرة ده لو مكنش الف
حاول تبنى اسمك و تصنع وطنك
حاول ترفع راسك من غير ماتبيع كرامتك
حاول تسعد ناسك من غير ماتخون ارضك
الف لأ ع اللى اتجرح و قلبه انكوى
افتحه تانى , بكره تحب و تحس انك طاير ف الهوا
ده ربك هو العادل اللى مقسمها كده
و يوم ما تضيق ف عنيك
تلاقيها ف ثانية بتجريلك
وتقولك ده حظك و نصيبك
ومسيرها ف يوم هتتعدل
ربك هو الناصر
ربك هو الأقوى
و قدام كل وقعة
الفرحة اكيد راجعة
الف لأ و لأ و لأ و لسه جوايا مليون لأ
بس ياترى يا صاحبى فاهمنى ولا لأ ؟؟
No comments:
Post a Comment