من بعد الثورة
قلنا اخيرا الارض رجعت للناس
والحق خلاص اتحطله اساس
واخلاق الناس بقت تتاقل بالماس
وفضلنا كتير بلدنا عالراس
بس كل مايقرب وقت القصاص
الدنيا تولع والناس تنداس
ولما نسأل على اى اساس
يقولك الطرف التالت
هواللى بيقتل ف الناس
الناس قالت مافهمناش
قام المشير قالك بلاش
نشيل الطوارىء
واكتر من الشغب ماعندناش
اخواتنا تموت
ورئيس الوزراءيا حرام ماتغداش
تقدر تقوللى انت
ده على اى اساس ؟؟
يعنى نعمل ايه ف اللى معندوش احساس
ماهو مش لازم يبقى ابنك عشان تحس بوجع الناس
لو كنت فعلا مسئول
كنت عرفت قيمة اللى مات
كنت عرفت قيمة اللى مات
و كل زنبه
انه شجع فريقه
بحب و حماس
ارحمونا يا بشر فاقدة للاحساس
واسهل حلولهم سرقة ارواح الناس
بسيناريو قديم ماسخ
و محفور ف الأّذهان
كفاياكو ظلم و هروب
بكفاية ملاوعة و شغل يهود
ده لو بايدينا كنا رميناكو ف دوله
بينا و بينها سدود و حدود
انتو مأجورين
ولا مايتتين
ولا اصلا ماعندكوش دين
انتو مين يا قتالين
لو معرفتوش الطرف التالت
ابقو اسألوا المصريين
وبصرخة واحدة منهم
هيعرفوكو هو مين
عشان دم اللى راحو مش رخيص
ولسه فينا ناس عايشين
عندهم حلم و مكملين
ولثورتهم مستمرين
